काठमाडौं । प्रधानमन्त्री पुष्पकमल दाहाल प्रचण्डले आफु हौसिएर हतारमा कम्युनिस्ट एकता गर्ने पक्षमा नभएको बताएका छन् । नेपाल कम्युनिस्ट पार्टी स्थापनाको ७५औं वार्षिकोत्सबको उपलक्ष्यमा एमालेले सोमबार ललितपुरमा आयोजित हीरक जयन्ती समारोहलाई सम्बोधन गर्दै प्रधानमन्त्रीले उक्त कुरा बताएका हुन् ।
‘हौसिएर हतारमा कम्युनिस्ट एकताको पक्षमा छैनौँ । नेकपा बनाउँदा त्यतिबेला हामी अलि हतारिएर हौसिएछौँ । अहिले फेरि सहकार्य भएको छ । उनले भने, विगतको तितो यथार्थबाट पाठ सिकेर अगाडि बढ्न आवश्यक छ।’
यस्तै उनले कम्युनिस्ट पार्टीबिच एकता र सहकार्य हुँदा विगतमा दुई तिहाइ मत ल्याएको स्मरण गर्दै सम्पूर्ण कम्युनिस्ट शक्तिहरू एक ठाउँमा आउन आवश्यक भएको बताए । दाहालले भने, कम्युनिस्टहरु जब एक अर्काविरुद्ध विद्वेष फैलाउने काम गरेका छौँ, त्यतिबेला कमजोर भएका छौँ । विगतका तितो यथार्थ सबैले मनन गरेर अगाडि जानु आजको आवश्यक हो ।’
प्रतिक्रान्तिबाट लोकतान्त्रिक गणतन्त्रलाई जोगाउन ठूलो चुनौती रहेको भन्दै प्राप्त उपलब्धिका जोगाउनका लागि सम्पूर्ण गणतन्त्रवादीहरू एक ठाउँमा आउन आवश्यक रहेको उनले बताए ।
