काठमाडौं — एसियाली खेलकुदको २०औँ संस्करण आजदेखि जापानको आइची–नागोया क्षेत्रमा औपचारिक रूपमा सुरु हुँदैछ। एसियाको सबैभन्दा ठूलो बहु-खेलकुद प्रतियोगिताका रूपमा रहेको यस संस्करणमा ४५ राष्ट्रिय ओलम्पिक समितिका ११ हजारभन्दा बढी खेलाडी सहभागी हुँदैछन्।
आइची–नागोया २०२६ सेप्टेम्बर १९ देखि अक्टोबर ४ सम्म सञ्चालन हुनेछ। प्रतियोगितामा ४३ खेल तथा ७१ विधामा प्रतिस्पर्धा हुनेछ भने कुल ४६९ स्वर्ण पदकका लागि खेलाडीहरूले प्रतिस्पर्धा गर्नेछन्।
उद्घाटन समारोह नागोयास्थित नागोया सिटी मिजुहो पार्क एथलेटिक स्टेडियममा आयोजना हुँदैछ। उद्घाटन समारोहको मुख्य विषय ‘Harmonic Heart Beat’ रहेको छ, जसले एसियाली खेलाडीहरूबीचको एकता र सम्बन्धलाई प्रतिनिधित्व गर्ने आयोजकले जनाएको छ।
यसपटकको एसियाली खेलकुद जापानमा आयोजना हुन लागेको तेस्रो संस्करण हो। यसअघि जापानले सन् १९५८ मा टोकियो र सन् १९९४ मा हिरोसिमामा एसियाली खेलकुद आयोजना गरेको थियो।
यद्यपि औपचारिक उद्घाटन आज हुँदैछ, फुटबल, बास्केटबल, भलिबललगायत केही खेलका प्रारम्भिक प्रतिस्पर्धा यसअघि नै सुरु भइसकेका छन्। अब उद्घाटनसँगै एसियाली खेलकुदको मुख्य प्रतिस्पर्धा थप तीव्र बन्नेछ।
आयोजकका अनुसार प्रतियोगिताले एसियाका विभिन्न देश र क्षेत्रका खेलाडीलाई एउटै मञ्चमा प्रतिस्पर्धा गर्ने अवसर प्रदान गर्नेछ। यस संस्करणको आधिकारिक नारा ‘Imagine One Asia’ रहेको छ।
