काठमाडौं । सात महिनादेखि फरार रहेकी नेपाली कांग्रेसकी सांसद माया राईलाई प्रहरीले पक्राउ गरेको छ। काठमाडौँ उपत्यका अपराध अनुसन्धान कार्यालयको टोलीले शनिबार कपनबाट उनलाई पक्राउ गरेको हो। स्वर्णलक्ष्मी सहकारीमा करोडौं रुपैयाँ दुरुपयोग गरेको अभियोगमा उनीमाथि मुद्दा दायर भएको थियो। एसएसपी रमेश बस्नेतका अनुसार, अब उनलाई जिल्ला प्रहरी परिसर, काठमाडौँमा बुझाई थप अदालत प्रक्रिया अघि बढाइनेछ।
माया राई स्वर्णलक्ष्मी सहकारीमा दुई कार्यकाल निर्देशक रहेकी थिइन्। यस अवधिमा निक्षेपकर्ताको ठूलो रकम दुरुपयोग भएको खुलेको छ। यद्यपि यति लामो समयसम्म प्रहरीले उनको खोजीमा चासो नदेखाएको भन्दै आलोचना हुँदै आएको थियो। पहिले प्रहरी प्रशासनले उनको अवस्थिति थाहा नभएको भन्दै चुप लागिरहेको देखिएको थियो, जसले उनीलाई सजिलै फरार बस्न सहयोग पुर्याएको देखिन्छ।
भोजपुर जिल्लाकी स्थायी बासिन्दा राई समानुपातिक प्रणालीबाट प्रतिनिधिसभा सदस्य बनेकी हुन्। फरार रहँदा समेत उनले संसद्बाट नियमित तलब र सुविधा लिइरहेको तथ्य बाहिर आएपछि यो प्रकरणले अझ ठूलो विवाद निम्त्याएको छ। जनताका प्रतिनिधिहरूबाट नै यस्तो गैरजिम्मेवार व्यवहार देखिनुले जनविश्वासमा गम्भीर चोट पुर्याएको छ।
हाल माया राई पक्राउ परेकी भए पनि सहकारीका मुख्य निर्देशक जीबी राई अझै फरार छन्। सहकारी घोटालाका पीडितहरू न्यायको प्रतीक्षामा छन्। यदि निष्पक्ष अनुसन्धान र प्रभावकारी कारबाही गरिएन भने, यो घटनाले सहकारी प्रणालीप्रतिको जनविश्वास झन् कमजोर बनाउनेछ। अब सम्बन्धित निकायहरूले गम्भीर भएर दोषीहरूलाई कडा कारबाही गर्नुपर्ने आवश्यकता देखिएको छ।
