काठमाडौं । फिफा विश्वकप २०२६ को नकआउट चरणअन्तर्गत आज (मंगलबार) र भोलि (बुधबार) अन्तिम ३२ का तीन महत्त्वपूर्ण खेल हुँदैछन्। पहिलो खेलमा आइभरी कोस्ट र नर्वे आमनेसामने हुनेछन्। त्यसपछि बलियो दाबेदार फ्रान्सले स्विडेनको सामना गर्नेछ भने दिनको अन्तिम खेलमा आयोजक राष्ट्र मेक्सिकोले इक्वेडोरसँग प्रतिस्पर्धा गर्नेछ। नकआउट चरण भएकाले पराजित हुने टोलीको विश्वकप यात्रा यहीँ समाप्त हुनेछ।
आजको पहिलो खेलमा आइभरी कोस्ट र नर्वे दुवै टोली जित निकाल्दै अन्तिम १६ मा स्थान बनाउन चाहन्छन्। दोस्रो खेलमा फ्रान्स उपाधि दाबेदारका रूपमा मैदान उत्रिनेछ भने स्विडेन अर्को ठूलो उलटफेर गर्ने लक्ष्यमा हुनेछ। यस्तै, घरेलु समर्थकको साथ पाउने मेक्सिकोले इक्वेडोरविरुद्ध जित निकाल्दै आफ्नो अभियानलाई थप मजबुत बनाउने लक्ष्य राखेको छ।
विश्व फुटबल समर्थकको ध्यान आज हुने यी तीनै खेलमा केन्द्रित रहने अपेक्षा गरिएको छ। नकआउट चरणका सबै खेल ‘गर या मर’को अवस्थामा हुने भएकाले रोमाञ्चक प्रतिस्पर्धाको अपेक्षा गरिएको छ। खेल बराबरीमा सकिए अतिरिक्त समय र आवश्यक परे पेनाल्टी सुटआउटमार्फत विजेता टोलीको टुंगो लाग्नेछ।
