काठमाडौं। ग्यास अभाव नियन्त्रणका लागि सरकारले उच्चस्तरीय पहल थालेको छ। बजारमा देखिएको ग्यास अभाव को अवस्थाबारे मुख्यसचिवको अध्यक्षतामा प्रधानमन्त्री तथा मन्त्रिपरिषद्को कार्यालयमा सम्बन्धित निकाय तथा व्यवसायीहरूसँग छलफल गरिएको हो।
छलफलमा ग्यास अभाव को वास्तविक अवस्था, आपूर्ति र वितरण प्रणालीबारे समीक्षा गरिएको थियो। व्यवसायीहरूले बजारमा ग्यासको वास्तविक अभाव नरहेको दाबी गर्दै उपभोक्ताले आवश्यकता भन्दा बढी सिलिन्डर भण्डारण गर्दा माग अस्वाभाविक रूपमा बढेको बताएका छन्।
बैठकले बजारमा सहज आपूर्ति कायम राख्न खाना पकाउने ग्यासको आयात बढाउने, वितरण प्रणालीलाई थप प्रभावकारी बनाउने तथा कृत्रिम अभाव सिर्जना हुन नदिन सम्बन्धित निकायलाई आवश्यक समन्वय गर्न निर्देशन दिएको छ।
सरकारले उपभोक्तालाई आवश्यकताभन्दा बढी ग्यास भण्डारण नगर्न आग्रह गर्दै बजारको अवस्थालाई निरन्तर अनुगमन गरिने जनाएको छ। व्यवसायी र सरकारी निकायबीचको समन्वयबाट आपूर्ति सहज बनाई उपभोक्तालाई सहज सेवा उपलब्ध गराउने लक्ष्य राखिएको छ।
