काठमाडौं । अमेरिकी राष्ट्रपति डोनाल्ड ट्रम्पले इरानविरुद्ध योजना बनाइएको अहिलेसम्मकै ठूलो सैन्य कारबाही तत्कालका लागि रोक्न अमेरिकी सेनालाई निर्देशन दिएका छन्। द न्युयोर्क टाइम्स र एक्सियोसका अनुसार शुक्रबार शीर्ष सुरक्षा सल्लाहकार र मन्त्रिपरिषद्का सदस्यहरूसँगको उच्चस्तरीय बैठकपछि ट्रम्पले नयाँ ठूला हवाई हमलाहरू स्थगित गर्ने निर्णय गरेका हुन्।
रिपोर्टअनुसार अमेरिकी सैन्य अधिकारीहरूले मध्यपूर्वमा तैनाथ सेनासँग प्याट्रियट इन्टरसेप्टर मिसाइल तथा अन्य हवाई रक्षा प्रणालीको भण्डार उल्लेखनीय रूपमा घट्दै गएको चेतावनी दिएका थिए। जोइन्ट चिफ्स अफ स्टाफका अध्यक्ष जनरल ड्यान केनले इरानविरुद्ध थप ठूलो सैन्य अभियान सञ्चालन गर्दा मध्यपूर्वमा रहेका अमेरिकी सैनिक र सहयोगी राष्ट्रहरूको सुरक्षामा गम्भीर जोखिम उत्पन्न हुन सक्ने सुझाव दिएका थिए।
अप्रिलको अन्त्यसम्म अमेरिकाले १,२०० भन्दा बढी प्याट्रियट इन्टरसेप्टर मिसाइल प्रयोग गरिसकेको जनाइएको छ। ट्रम्पको यो निर्णय अस्थायी हो वा दीर्घकालीन भन्ने विषयमा स्पष्ट जानकारी सार्वजनिक गरिएको छैन। यद्यपि, आवश्यक परे अमेरिकी सेना कुनै पनि बेला ठूलो सैन्य कारबाहीका लागि तयार रहेको बताइएको छ।
यस निर्णयपछि लगातार १३ रातसम्म इरानका सैन्य अखडाहरूमा बमबारी गर्दै आएको अमेरिकाले शुक्रबार राति भने कुनै नयाँ हवाई हमला गरेन। अर्कोतर्फ, इरानले बहराइनस्थित अमेरिकी फिफ्थ फ्लिटको नौसैनिक अड्डामाथि ड्रोन र मिसाइल आक्रमण गरेको दाबी गरिएको छ, जसका कारण त्यहाँ शक्तिशाली विस्फोट भएका समाचारहरू आएका छन्।
यसैबीच, जोर्डनमा हालै तीन अमेरिकी सैनिकको मृत्यु भएपछि अमेरिकाभित्र सुरक्षा चिन्ता थप बढेको छ। इरानी आक्रमणका क्रममा एउटा ब्यालिस्टिक मिसाइल अमेरिकी सुरक्षा घेरा पार गर्न सफल भएको दाबी पनि गरिएको छ।
दुई सातादेखि जारी सैन्य तनावका बीच शनिबार पहिलो पटक रातिको समयमा कुनै हवाई हमला भएन। तर, सम्भावित अवस्थालाई ध्यानमा राख्दै पेन्टागनले मध्यपूर्वमा थप सैनिक र अत्याधुनिक हतियार पठाइसकेको जनाएको छ।
अमेरिकी सैन्य योजनाकारहरूले इरानका ऊर्जा पूर्वाधार, यातायात सञ्जाल तथा पिकएक्स माउन्टेन क्षेत्रमा रहेको भनिएको आणविक केन्द्रमाथि सम्भावित हमलाका विकल्पहरू समेत तयार पारेको बताइएको छ।
