शिक्षक आन्दोलनको कारणले कक्षा १२ को वार्षिक परीक्षा सारिएको छ। यसअघि यही वैशाख ११ देखि सुरु हुने भनिएको परीक्षा अब वैशाख २१ गतेदेखि सञ्चालन गरिने भएको छ। राष्ट्रिय परीक्षा बोर्डका परीक्षा नियन्त्रक कृष्ण शर्माका अनुसार आन्दोलनका कारण उत्पन्न परिस्थितिलाई मध्यनजर गर्दै परीक्षा सारिएको हो। प्रधानमन्त्री केपी शर्मा ओलीले पनि परीक्षा सार्न निर्देशन दिएका थिए।
अर्कोतर्फ, अमेरिकास्थित हार्वर्ड विश्वविद्यालयले ट्रम्प प्रशासनविरुद्ध संघीय अदालतमा मुद्दा हालेको छ। ट्रम्प प्रशासनले विश्वविद्यालयलाई दिँदै आएको २ अर्ब अमेरिकी डलरभन्दा बढीको संघीय अनुदान रोकिएको आरोपमा हार्वर्डले सोमबार बोस्टनस्थित संघीय अदालतमा मुद्दा दायर गरेको हो। विश्वविद्यालयले शिक्षा क्षेत्रमा राजनीतिक हस्तक्षेप अस्वीकार्य भएको बताएको छ।
यसैबीच, निजामती कर्मचारीले लोकसेवा आयोगले लिने परीक्षाको तयारी तथा अध्यापनका लागि पूर्वस्वीकृति लिएर पढ्न र पढाउन पाउने कानुनी व्यवस्था हुनुपर्ने माग गरेका छन्। कर्मचारी युनियनका नेताहरूले आफ्ना विषयगत विज्ञता उपयोग गर्न पाउने अधिकार सुनिश्चित गरिनुपर्नेमा जोड दिएका छन्। उनीहरूले यस विषयमा स्पष्ट कानुनी प्रावधान हुनुपर्ने माग समेत राखेका छन्।
