आगामी तीन दिनसम्म रातिमै बढी वर्षा हुने

काठमाडौं । आगामी तीन दिनसम्म विशेषगरी रातको समयमा मुलुकका विभिन्न स्थानमा अझै वर्षा हुने सम्भावना रहेको जल तथा मौसम पूर्वानुमान माहाशाखाले जनाएको छ ।

केही दिनयता भएको भारी वर्षाले बाढी तथा डुबानजस्ता समस्या ल्याए पनि बुधबार रातीदेखि सुधारात्मक बन्दै जाने महाशाखाको भनाइ रहेको छ । महाशाखाका मौसमविद् रोजन लामिछानेले भने, “तीन दिन यताको अवस्था हेर्ने हो भने रातको समयमा धेरै पानी परेको थियो, डुबान र बाढीसमेत गयो, आगामी तीन दिन पनि पानी पर्छ तर सुधारात्मक बन्दै जानेछ”, तर देशभर मनसुनी वायुको प्रभाव रहेको र मनसुनको न्यूनचापीय रेखा सरदर स्थानको आसपास अवस्थित रहेकाले प्रायजसो रातको समयमा पानी बढी परेको हो।”

त्यस्तै, कोशी, बागमती, लुम्बिनी र सुदूरपश्चिम प्रदेशका थोरै स्थानमा तथा मधेस, गण्डकी र कर्णाली प्रदेशका एक-दुई स्थानमा भारीदेखि धेरै भारी वर्षाको पनि सम्भावना रहेको महाशाखाको भनाइ छ।