काठमाडौं — प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच सिंहदरबारस्थित प्रधानमन्त्री तथा मन्त्रिपरिषद् कार्यालयमा आज भेटवार्ता भएको छ। समसामयिक राजनीतिक विषयहरूमा केन्द्रित छलफलमा संक्रमणकालीन न्याय प्रक्रिया, नीति तथा कार्यक्रम, र सत्ता समन्वयका विषय उठान गरिएको जनाइएको छ।
भेटवार्तामा माओवादी केन्द्रका अध्यक्ष पुष्पकमल दाहाल ‘प्रचण्ड’लाई समेत आमन्त्रण गरिएको भए पनि उनी सहभागी भएनन्। नेताद्वयबीचको छलफल हालको राजनीतिक परिस्थिति, संविधान कार्यान्वयन, र द्वन्द्वकालीन मुद्दाहरूको निष्कर्षमा पुग्ने प्रक्रियालाई अगाडि बढाउने विषयमा केन्द्रित रहेको स्रोतले जनाएको छ।
संक्रमणकालीन न्यायको विषयमा खासगरी सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगलाई पुनर्गठन गर्दै निष्कर्षमा पुर्याउने प्रयास भइरहेको छ। ओली सरकार यस विषयमा राष्ट्रिय सहमति कायम गर्न खोजिरहेको बेला देउवासँगको छलफल भएको हो।
यद्यपि, प्रचण्डको अनुपस्थितिलाई राजनीतिक रूपमा अर्थ लगाउने प्रयास भइरहेको छ। उनले किन छलफलमा सहभागिता जनाएनन् भन्ने विषयमा औपचारिक धारणा आइसकेको छैन।
